Connect with us

男士通信

【攝影攻略】市場熱門相機全詳盡攻略

Article

【攝影攻略】市場熱門相機全詳盡攻略

【攝影攻略】市場熱門相機全詳盡攻略

作為男士玩具及嗜好的頭三甲,相機、攝影絕對是每位男士的必修科。男士日報定期攝影專欄,由一生鐘情攝影的作者木人里為大家寫出【攝影攻略】,今期攻略內容:市場熱門相機,逐一分析!

上次寫左一篇《攝影新手選購相機攻略》,同大家分享左一啲攝影素人係買相機時會遇到既問題,同埋提供一啲建議,我地係決定買邊部相機之前,到底需要考慮啲乜。礙於篇幅有限,係前文只係講左一啲原則,但買邊部機,就淨係提供左個model,但無解釋。咁到底點解我會咁建議先?

今次乜人用乜相機系列,我會就住「業餘」同「專業」分別撰文。所謂業餘同專業,唔係指技術既高低,而係指你會唔會用呢部相機搵食。工作用機同非工作用機,有好多唔同既考慮。本文就先講業餘用家,到底有咩要關注,有咩選擇。但留意,我雖然係按唔同相機既特性提供建議,但唔代表一部相機只有單一既用途,即係我買一部風景攝影表現好既機,等唔等同你用佢影唔到好既人像?當然唔係!

市場熱門相機 全詳盡攻略

1.日常萬用既選擇:可變焦DC

由廣角到遠端都兼顧到的相機,可以滿足日常以及旅行攝影的基本需要。

dc_03

輕便高質 Sony RX100m3/4/5 

如果你係網上面問,想買一部輕便而質素高既相機,大概有9成人都會建議你買Sony Rx100系列。Rx100系列係一部使用一吋感光元件既相機,相機重量270g左右,細得可以放進口袋既機身,加上配備等同全片幅標準狀焦鏡既焦距(24–70mm),f1.8大光圈,可自拍用既反Mon等等,對於一個打算平日帶在身邊,用於拍攝日常生活,記錄家庭,旅行攝影的用家黎講,基本上係完全滿足所有要求。順帶一提,rx100m3開始到最新既m5都配備彈出式電子觀景器,對觀景器情有獨鍾既朋友可以留意下。

dc_01

天涯神機 Sony RX10m2 

Sony RX10m2唔係一部便携既相機,而係一部近乎單反大細既Prosumer相機。配備1吋感光元件,24–200mm等效鏡頭,f2.8光圈,重量770g。

呢部相機比起rx100大部咁多,有咩主要優勢?首先最重要當然係24–200mm既鏡頭,兼顧到日常使用之餘,可以提供到一定程度既遠攝,對於唔想換鏡頭既朋友黎講,絕對係一機走天涯既好選擇。光學防手震相當出色,縱然係遠攝都無問題,加上Sony 1吋感光元件已經相當成熟,可以拍攝到相當細緻既影像。如果重量唔係你關注既野,呢部機絕對係一個好選擇。

2.日常及街拍向既選擇:定焦DC

街拍向既相機一向有幾個特點,首先係便携,對路人威脅低。另外普遍會配備28mm/35mm的鏡頭,與人眼視覺接近。下面幾個建議都係定焦相機,所以比起上文既提議,可能稍為無咁方便,但畫質相應更好。

dc_05

街拍最強 Ricoh GR2

被喻為為街拍而生既相機,配備apsc感光元件,28mm等效鏡頭,f2.8光圈,低調的機身,重量只有215g。畫質很好,影風景與人像都有好表現。對焦快而寧靜,內置幾種獨特濾鏡,特別係高對比黑白濾鏡,呢種極強烈味道既黑白,係Ricoh Gr系列既一大賣點。

但要留意既係Gr幾容易入塵,要小心安放,同埋佢個Wifi功能幾雞肋,過相落手機慢,而且經常不能連接。總結黎講,佢係好適合街拍,但亦可以用於日常既相機。

dc_02

菲林效果 Fujifilm x100t/s

Fujifilm x100s/t最主要分別係wifi功能,所以我會混為一談。x100系列配備apsc感光元件,35mm等效鏡頭,f2光圈,重量330g的復古機身,專利混合式觀景器,係富士標誌性既產品。35mm係最接近人眼既視角,拍出黎既照片平實,舒服。如果加上官方推出既wcl-100同tcl-x100鏡頭,可以係唔影響畫質之下將x100變為28mm等效或50mm等效鏡頭,令相機用途更廣。

而富士相機最為人稱頌既,係佢獨特既色彩。傳統菲林大廠既富士,將佢地菲林既色彩表現展示係佢地既數碼相機上面,x100係拍攝風景,人文都恰如其份。

但需要留意既係,雖然x100的最近對焦距離好近,但如果在大光圈的情況下近拍,成像會變得鬆散。總結而言,x100系列係一部影像畫質與發色良好,算係便携,而且外型滿分既相機。只係同Gr相比,體型比較大,未能當作口袋機使用。

dc_06

復古再臨 Fujifilm x70

如果喜歡富士相機既復古外型,但想要一部畫質接近而更輕便常用既相機,可以留意下x70。Fujifilm x70配備Apsc感光元件,28mm等效鏡頭,f2.8光圈,機身重量302g,多角度反Mon。

x70保持到富士相機一貫既色彩同畫質,對焦時間很快,同時方便用家日常自拍或不同角度既取景,配備一個x100系列無既反mon。而x70亦方便用家,加入左可以用外置充電器以usb充電既功能,以及傳輸速度合格既wifi功能。

總結黎講,佢都係一部可以應付日常拍攝,以及適合街拍既好相機。

dc_04

便携皇者 Sony RX1r2

Sony Rx1系列初登場既時候,可以話係震驚左市場。因為一部細小既機身居然配備左4240萬像素既全片幅感光元件,領先於隨身機市場。但亦因此,佢既價錢同上面幾部機相比高出幾倍。

配備35mm定焦鏡頭,f2光圈,重量507g,多角度反Mon,彈出式觀景器,功能強大,直到宜家,仍然可以稱為隨身機既皇者。

正如上面所講,Rx1r2既價錢係相當貴,貴到差唔多可以用同樣價錢買一部高階既單反/無反,呢個時間就要問自己,係唔係真係需要用到咁貴。全片幅既畫質同散景表現係好好,而且以便携而言,市面上係無同類型產品(Leica例外),如果負擔得起,又真係用得著既,呢部機絕對唔會令你失望。

好啦,暫時講咁多,之後我會再建議業餘用家可以考慮邊幾部無反,單反,以應該不同既攝影需要。希望呢啲建議幫到你地

作者/木人里
一生鐘情攝影的攝影L,歡迎各位前輩指教。

Click to comment

發表迴響

More in Article

Latest…

Tag

To Top
%d 位部落客按了讚: