Article

【攝影攻略】新手買相機,到底買邊部?

【攝影攻略】新手買相機,到底買邊部?

作為男士玩具及嗜好的頭三甲,相機、攝影絕對是每位男士的必修科。縱使今時今日的手機如iPhone 7的鏡頭已經非常無敵,但作為男士如果沒有一部相機守門口,實在要大大扣分。但新手買相機,可以如何選擇?

新手買相機的4個自我提問

以前數碼相機未普及既年代,攝影可以話係小圈子玩意。因為購買菲林成本幾高,去曬相又麻煩,一般人可能間中去旅行或者重要日子先影下相,而唔會好自然咁發展成一個興趣。礙於門檻高,以前同宜家相比,一般人對攝影既認知係有相當大既分別。

而因為近年數碼相機發展非常快,而價錢普遍親民,加上互聯網,智能電話既發展,配合社交媒體,攝影已經由小眾玩意,慢慢變為一種日常習慣。隨住日子愈耐,開始愈黎愈多人唔滿足於手提電話既影像質素,而希望認真買部相機。隨之而黎,就出現一堆日經問題─我應該買咩相機?邊部相機好啲?等等等等。

面對住呢個永無終結既問題,我以下會簡單整理一個指引,令各位思考一下到底乜野係最適合自己。唔係最貴,最新既model就一定係最好,切合需要先係最緊要。各位男人,如果你係攝影新手,對購買相機有煩惱既話,可以睇埋落去作為參考。

首先問下自己一啲問題先啦:

1.我係屬於邊種用家?業餘用家,定係專業用家?

2.我最關注咩功能?輕便?外型?畫質?對焦?拍片?

3.我有幾多預算?希望可以一舊錢一勞永逸,定係願意繼續投資?

4.我會用部相機黎影啲咩先?日常生活?女友?街拍?約模特兒?影風景?旅遊記錄?活動記錄?拍攝短片?拍攝運動?生態攝影?

點解要問咁多問題?因為如果你唔認知自己既需要,好容易會買左唔適合自己既相機,到時浪費金錢就恨錯難返。響解釋上面4個提問之前,為方便心急人士,我先提出自己建議,再慢慢解答(希望有人睇字吧)。

新手買相機:建議入手相機一覽表

(截至2016年11月2日)

業餘,日常萬用,便携:Sony RX100m3/4/5

業餘,街拍,便携:Ricoh GR2,Fuji x100t/s,x70,Sony RX1m2

業餘,風景,人像,畫質:Sony A7 2/r2,a6300,CANON 5Dm3/4,NIKON d810,Fujifilm xt2/xpro2。

業餘,畫質,對焦:NIKON d500

專業,運動攝影,動物攝影,對焦:CANON 1dxm2,nikon d5

專業,風景,人像,畫質:CANON 5dr/m4,NIKON d810,Sony A7r2

業餘,拍片:CANON 80d

專業,拍片:CANON 5dm3/4,Sony A7s2/r2

以上建議,全部同前文4個問題有關。睇下文之前,都可以同時打開個google,因為關於相機類型或術語係可以好易搵到,我唔花篇幅去解釋啦。

至於運動型相機方面,因為我唔太認識既關係,就唔亂推薦啦。

1.我係屬於邊種用家?業餘用家,定係專業用家?

業餘攝影人,因為唔受工作所限,選擇相機相對自由。因為你唔需要面對客人,唔需要用「專業」器材去建立你專業的形象。你只需對你個人既需要負責。所以你可以考慮dc,prosumer,無反,單反,旁軸,運動相機,咩都可以。

但專業用家除左相機功能之外,好現實咁講,專業既器材係會令客人對你更信任。而係市場上,普遍客人,尤其係上一代,對專業既認知係:單反,亦有部分會分到係唔係全片幅。所以專業用家可能要向呢個方向考慮。但當然,近年無反相機既發展一日千里,已經愈黎愈多專業攝影師改為使用較輕便既無反相機工作,例如sony全片幅既a7系列。

2.我最關注咩功能?輕便?外型?畫質?對焦?拍片?

如果唔係攝影既發燒友,其實真係未必接受到揹住部牛龜咁重既相機係身,尤其近年輕便既dc/prosumer質素愈黎愈高,某部分既質素已經超越左入門單反,所以如果預視到自己唔鍾意揹重野,唔好睇小近年新出既機仔。

講到外型,近年相機有兩個大方向,一個係繼續走單反專業外型,而另一個就係復古相機既文青外型。單反大家都好清楚,外表專業,唔影得都睇得。復古呢條路線,由富士x100面世之後,就愈黎愈多廠商向呢個方面發展。nikon j5,oympics em,canon eos m5,nikon df等等,都走復古風。重點就係要個陣文青除。

至於影響畫質最主要既因素,要睇相機既感光元件大細。當前一般用家黎講,數碼相機最普遍既幾種感光元件分別為full frame >apsc>3/4>一吋,由大到細。愈大既感光元件記錄到更多既影像電子資訊,畫質既清晰度都會有高低之分。

而大家以前好關注既像素,其實係牽涉你影個張相有幾大張,隨住顯示屏既發展,起碼2400萬像素或以上既相片先可以係mon上面清晰睇到,如果像素太少,好容易會矇左,因為你個mon太清晰,反而顯露左相機既缺點。唔明既話,想像一下:你手上有個四方型既盒,入而有16粒方塊,密密麻麻─呢個係以前既mon睇既野。你買左個新既mon返黎,佢係一個比以前更大既盒,你將個16粒方塊放入去,係填唔滿個盒,你強行將16格充滿成個畫面,粒與粒中間空間大左,就會成為我地見到,一張唔清晰既相。所以,雖然愈高像素唔一定張相會靚左,但太低就會見到影響。

對焦快慢就比較簡單,你想一拎起部機,十分一秒都唔使,已經可以捕捉到景物,定係唔怕慢慢對焦呢?睇你自己啦。

相機同時可以影相同拍片已經係好基本既功能,但你對影片質素既要求高唔高?高清便可,定係要有4K?可唔可以手動對焦?呢啲都係你既考慮。

3.我有幾多預算?希望可以一舊錢一勞永逸,定係願意繼續投資?

呢個問題首先當然係講緊你有幾多預算,到底買最新最勁既model,定係買舊一代?或者唔一定買單反,可以無反或者apsc dc仔已經夠用?

而其次,你既預算都牽涉你買一部可以換鏡既相機,定係唔可以換鏡既。因為鏡頭既價錢係隨時貴過你部相機,你愈影,只會愈追求更大光圈,更多不同焦距,就變成一種投資。

專業既相機亦帶黎好多配件工具既使費,例如要一支硬淨啲既腳架,一個功能齊備既防潮箱,一個安全既相機袋,同一條穩陣既相機帶等等,全部都係錢,你有無心理準備?唔係既話,其實中至高階既不可換鏡相機,其實都有好好既質素,可以省到唔少支出。

4.我會用部相機黎影啲咩先?

逐一講講到痴線都未講完,我會整理一下。

日常生活,街拍,旅遊記錄:重點係便携。

影女友,影模特兒,影風景:重點係畫質同可換鏡。

拍攝運動,動物:重點係對焦同連拍速度。

生態攝影:機身既保護能力要強。

你要知道,相機出新款既速度好快,我宜家講個model出黎,可能你半年後睇已經唔適用。以下我會提出一啲建議,唔客觀既因為絕對係個人喜好。始終用家係你自己,我唔會比你更清楚你既需要,所以下文供參考,你自己都要搵啲資料先得。

希望大家睇完上文,可以解決到一啲係買相機時遇到既煩惱,同埋避免後悔。我見過唔少朋友,買左部相機返黎,用落先覺得唔啱自己,可能係太重,可能係對焦唔夠快,又可能係嫌畫質唔好,咩原因都有,歸根究底,就係事前諗得唔夠全面。希望呢篇文章幫到各位。

有問題可以留言問,我幫到既盡幫,當然都會有其他讀者幫手。

睇大家有無興趣,我會預備一篇選購鏡頭攻略,為各位男士既拍攝需要提供選購鏡頭既建議。如果大家想睇,可以留言同我講架。

作者/木人里
一生鐘情攝影的攝影L,歡迎各位前輩指教。

About Author

一生鐘情攝影的攝影L,歡迎各位前輩指教。