Article

【日本大開發】四萬十川—日本最後的清流

【日本大開發】四萬十川—日本最後的清流

港人愛日本,由文化至旅遊,無孔不入。日本旅遊攻略、心得也許你我都略懂,但與其去10次東京就扮日本達人,倒不如玩得更癲,試試深度日本遊!「一支公嘅遊日攻略」正式啟動,有請真。老師Ming蛇介紹!

%e5%9b%9b%e8%90%ac%e5%8d%81%e5%b7%9d_07

四萬十川 日本最後的清流

相信大家都睇過唔少Facebook上面關於一個人去旅行嘅原因,有咩好處blar blar blar….諸如此類嘅文章。所以我今次一開波就嚟直接講一支公去日本要揀咩地方啦。咩話?點解一定要係去日本?好簡單,因為十個香港男士,有十個都鍾意日本。

%e5%9b%9b%e8%90%ac%e5%8d%81%e5%b7%9d_08

咁去旅行第一樣嘢就梗係要揀目的地啦。畀你揀嘅話,你第一時候會諗到咩地方先?東京?大阪?名古屋定北海道?如果你係唔習慣自己一支公去旅行嘅,可能你都會冇咩方向,揀以上啲大城市去過吓就算,但我而家話你知,其實一支公去日本最理想嘅目的地就係嗰個地方係有啲嘢你係好想去做但九成九無朋友/女友會陪你去嘅,咁就去嗰度啦!因為你難得可以一支公去,幾大都去做啲自己想做嘅嘢啦!(當然,若有伴都喜歡冒險,都可齊齊上路)

%e5%9b%9b%e8%90%ac%e5%8d%81%e5%b7%9d_01

另外,如果你係被動一支公毒拎去旅行嘅話,不妨試吓揀一啲冇咁熱門嘅地點去吓,最好嗰啲地方係有啲特色景點但又唔多人識可以打吓卡,post相上Instargram 呃like嘅,下次同friend或者女神傾計都多個話題呀。例如小弟上次去位於四國高知嘅中村市四萬十川就係一個幾值得推介嘅地方啦。

%e5%9b%9b%e8%90%ac%e5%8d%81%e5%b7%9d_02

我推介呢個地方嘅第一個原因就係因為呢個地方嘅來頭唔細,講出嚟話自己去過都幾型架。四萬十川被譽為「日本最後嘅清流」,爭係講出嚟個名都夠晒sound bite啦,再加上如果你/你想showoff嘅對象係日劇迷嘅話,咁就更加要嚟一轉啦,因為日劇《遲開的向日葵》(生田斗真同真木陽子主演)裡面有唔少嘅靚人靚境都係四萬十川呢個地區取景拍攝架。<參考資料>

%e5%9b%9b%e8%90%ac%e5%8d%81%e5%b7%9d_06

另外一個原因就係需知道通常一支公去旅行嘅男人,好多時都係想一個人思考下人生或者熱血下,而四萬十川就可以滿足你呢兩個願望啦。

推薦租單車遊四萬十川

如果你想放鬆同思考人生下嘅,可以係四萬十川觀光案內所租架單車,係隔離嘅超級市場買啲輕便嘢食後出發,過咗著名嘅紅鐵橋(四萬十川橋)之後沿住河邊踩上去,途中會有唔少涼亭,係三四月嗰陣櫻花同油菜花盛開嗰陣,坐底食少少嘢影張相思考下人生都唔錯,之後一直去就會見到四萬十川當中比較出名嘅係位置最近同時間亦都係長度最長嘅沉下橋 - 佐田沉下橋。呢度係唔少人影相嘅著名景點,到時可以係無圍欄嘅沉下橋中間感受下呢條日本最後嘅清流。

%e5%9b%9b%e8%90%ac%e5%8d%81%e5%b7%9d_03

如果你係想熱血下嘅,不妨爆盡啲踩埋上去勝間沉下橋睇埋四萬十川另外一個特色景點—鯉魚旗,不過計埋來回行程就差唔多40Km,所以都幾考體力架。另外,每年櫻花季節當地都會舉辦馬拉松比賽,各位熱血跑友不妨留意下。

%e5%9b%9b%e8%90%ac%e5%8d%81%e5%b7%9d_04

最後講返少少交通方法:

一般建議由高知駅出發,有JR特急直達中村駅,車程大約1小時44分鐘;而係中村駅行去四萬十市觀光案內所大約5分鐘。
單車由觀光案內所出發去到佐田沉下橋回頭約17Km,需時大約3小時。
如果去埋勝間沉下橋睇鯉魚旗來回就大約40km,需時大約4.5小時。
普通單車(無波段可轉),五小時嘅租金係600yen,之後每小時計就100yen;登山單車五小時嘅租金係1,000yen,之後每小時計就200yen。(強烈建議揀登山單車)

作者/Ming蛇
一個教書佬,對教學無咩熱誠但對去日本充滿無比熱誠,目標係想話畀大家知其實唔使日文好叻先可以去一個人去日本架。歡迎大家一齊交流,留言俾我或《男士通信》啦!

About Author

一個教書佬,對教學無咩熱誠但對去日本充滿無比熱誠,目標係想話畀大家知其實唔使日文好叻先可以去一個人去日本架。歡迎大家一齊交流,留言俾我或《男士通信》啦!

Comments (2)

  1. Wow ming sir! You're an expert man! Please post more and tell us more about Japan, I'm sure not many people know as much as you. Hope you can update everyweek! Did you study in Japan or something? You're so cool man! Maybe you can teach Japanese as well.

  2. ansonchung121

    First, thx for your comment and sorry for the late reply=] Actually I think there are many people who know Japan much more then I do. Also I am not study in Japan (which I would like to) and I only know a little bit Japanese. If u are interested in my post, pls stay tuned with Men logic, and I will try my best to update asap XD
    Once again, thx for your support.

Comments are closed.