Article

【專欄】跟住執行李!自駕遊5大必備電子小物!

【專欄】跟住執行李!自駕遊5大必備電子小物!
香港人最愛日本,由東京到大阪都是慣性旅遊地點,近年熱門旅遊點亦愈玩愈偏,連瘋狂shopping的杜如風都要開發名古屋區,證明玩法已變!其中1個最愛的玩法,自然是自駕遊,假如你未曾在日本玩過自駕遊其實相當可惜,皆因日本駕駛文化優越,司機態度多數良好,配套亦足,只要有目的地電話已可用GPS認路。有車除了方便出入outlet購物外,還可自駕到偏遠地區感受繁華以外的一面。以下還有5個必備電子小物,你應該要知!

自駕遊 5大必備電子小物!

日圓近期勁跌,有假期一定要即刻買機票即刻飛去狂食狂買。而車友選擇自駕遊上路之前,一定要睇清楚以下Gadget帶齊未,漏咁一兩樣,肯定令到旅程大跌Watt!
%e8%87%aa%e9%a7%95%e9%81%8a02

(一) 安全至上車Cam

你係香港揸車都一定裝車Cam,何況一年先去兩三次的日本呢?為己為人,當然要帶定車Cam,萬一發生意外,都有片有真相,唔怕語言不通仲要同人口同鼻拗。如果香港無用開,想知點揀車Cam,等拍車男遲下再詳細介紹,等唔切要即刻落街買,就記得買埋記憶卡呀!

(二)車用充電分插

首先,畀車Cam霸完一個位用電,咁部手機咪無位充囉?所以點可以唔帶定一個分插呢!至於點解手機要充電,好簡單,當然雙管齊下幫手帶路,機頭一個導航、手機Google Map一個啦!即係唔係話當地車機導航靠唔住,而係當你一個唔小心轉錯路口,好老實,手機導航往往快足幾倍教你行過另一條路,有返個指示,心都定啲啦!

(三)平價手機座

好多車主個車用手機座都係痴實晒,好難拆出。去旅行用幾日,簡單少少去鴨記買個幾十蚊頂住先。個人覺得夾係冷氣機位的手機座最穩陣,又夠平,用完幾日漏低係日本都無咁肉痛。

(四)3.5mm音源線

想確保揸長途車有歌聽下,唔洗個個瞓晒得你一個做柴可夫咁灰,建議一定要多帶一條3.5mm音源線。因為租車有機會遇上較舊款的車,未必支援藍牙,就算有,不同車廠有不同設定,你都未必識駁。如果你用緊iPhone 7/7 Plus,咁你索性帶多個藍牙喇叭仔算啦。

(五)快充後備電

又導航又聽歌,手機舊電其實倒水咁倒,如果你個車充分插無快充,一落車就幾乎奄奄一息。唔想達目的地時,手機連影相都無電,又點可以唔帶定尿袋,仲要快充個隻,唔該!

記住,在外旅遊要有禮,若然自駕更要留意駕駛態度,香港人愛「飛車」及瘋狂cut線,日本就多數禮讓唔趕時間,總之保持良好駕駛態度,出發前溫定書做個高質香港人~

About Author

《男士通信 Men Logic》網站及專頁為一體式網絡全方位資訊平台,「通信(tsūshin)」一字源自日文,有通知、傳訊一類的意思,並以「男孩剛剛成長為男士」這個命題為宗旨,提供給所有仍有著童心的男士均會感到興趣的遊樂資訊。