Connect with us

男士通信

【真實車評】Smart BRABUS 改完都係得啖笑

Article

【真實車評】Smart BRABUS 改完都係得啖笑

【真實車評】Smart BRABUS 改完都係得啖笑

本來拍車男無打算試呢部車,不過上次見到有讀者留言話有興趣,咁拍車男就唯有抱住「我不入地獄,誰入地獄」嘅心態去試下。先利申,拍車男唔係唔鍾意Smart fortwo或forfour,佢哋推出電能車版本,我係好期待,因為兩者好match!重好希望可以快啲喺香港試到添。但係對於新一代嘅Smart,甚至乎由BRABUS操刀嘅強化版,如果100分滿分,我都唔知比幾多分好,唔係因為好到俾唔落手,反而係啱啱相反。

「哇,唔係掛?」係呀,我都想問車廠呢個問題,一部車門震過貓王嘅車,同內櫳設計差同用料唔好嘅歐洲車,點解會面世到?點解?

Smart BRABUS forFour後座太窄得啖笑

Smart BRABUS版都有forTwo同forFour版本,但基本上大家只需要睇forTwo就ok,因為forFour嘅後座窄到阿媽都唔認得,我唔知道有咩人可以坐落去重可以講到一聲「舒適」嘅,如果你身邊有朋友覺得舒服,不妨話比拍車男知。BRABUS版嘅外形無變,無加到包圍,個樣無惡到。係,有啲可惜嘅,但興幸個內櫳好正。可能比普通版個陣膠味嚇死咗,要求降低咗,BRABUS版用上大量皮革,軚盤、座椅、車內各部份都以皮革同膠互相配合而成,但襯得好好,BRABUS專用地氈添,個豪華感出番哂嚟,可惜最嚴重個問題依然存在。 係咩?就係震動,車門會震、內櫳嘅震動幅度亦大,好似玩緊機動遊戲咁,個車架做咩事先?日本車都唔會有呢啲問題,一部歐洲車反而有,到而家為止我都唔係好明點解。另外,支波棍亦要扣分。波棍旁嘅PRDS嘅指示燈,放咗喺支棍上方,駕駛者隻手同支棍係全完全阻住,只能靠睇錶板螢幕先至可以知道轉緊咩波。P波定入咗R波?每次都要好小心睇清楚先得。喺嗰果moment,拍車男寧願揸棍波車。

BRABUS版都有可取之處

好似講到好差咁,但其實都有好嘢嘅,就係性能。普通版本嘅forTwo用直列三缸引擎、71匹馬力、Twinamic六速雙離合器波箱。呢個性能喺平路多過斜路嘅歐洲完全無問題,但係喺香港出哂事,無力水到一個點係你唔想再坐喺個司機位。但BRABUS版唔同,引擎有調校過,匹數上升至109匹@5,750 rpm、扭力達170Nm@2,000 rpm。一踩油門,其實已經feel到個分別,力量爆發得好快,爽勁亦都有,難得軚感同油門感覺實在,操控性至乎番咗嚟先。喺斜路唔會有無力感,重可以飛馳下直路,爬下頭或者喺高速公路都無問題。之不過,話就話有改良懸掛同轉向,但係佢轉彎依然要再改善,喺迴旋處或者比多少少油轉彎,車身偏傾幅度好大,真係會驚驚地。而且性能加大咗,煞車制動系統無同步改良,繼續行前碟後鼓。雖然並非鼓勵大家飛車,但前碟後碟始終安全好多。

咁講到最尾,買唔買得過?拍車男就無咩特別興趣,反正買得Smart嘅都係粉絲或有多餘錢買多部去下買餸用。每部車都有佢個市場,只係Smart喺香港嘅市場特別艱難。嗱,比個車價參考你,Smart forTwo BRABUS車價$267,000起(普通版$168,000起)、Smart forFour BRABUS車價$288,000起(普通版$192,000起)。聰明嘅消費者,自己諗啦。

 

撰文:拍車男
汽車專欄【真實車評】,減廢話減無謂形容,正就讚、渣就鬧,無面比,只求為大眾看見真實一面,買得放心。
拍車男:https://www.facebook.com/autoguyzrelation
Click to comment

發表迴響

More in Article

Latest...

Tag

To Top
%d 位部落客按了讚: