Article

娛樂記者為何是獅子?由香港記者的「壇」說起…

娛樂記者為何是獅子?由香港記者的「壇」說起…

拖下拖下,拖到 2017 先有新文,在此有機男先祝各位新年快樂!我應承大家,新既一年我會繼續寫文俾大家笑。

上回講到我作為科技版/副刊記者,會怕同港聞記者同場,但更怕工作時遇到娛樂版記者。有朋友睇完篇文問我,何解娛樂係「獅子」?關於呢個問題,或者可以俾我兜遠少少、同大家講得多少少,由我地記者既「壇」講起。

娛樂記者為何是獅子 由記者的「壇」說起…

「壇」,故名思義就係用黎「作法」,影開產品都知有時需要啲白底相,攞到機之後就會「開壇」。我地科技版記者既壇,成份可以好簡單,有時個場有露天位既,就地擺張白卡紙/Folder,放件 Product 上去就搞掂;遇著啲燈光好似 Disco 咁、又藍又紅又紫既場就難少少,老前輩教落用幾個 Folder 自組一個「箱」,放支閃光燈入去引閃,效果都唔錯架!

科技版既壇就講完,咁娛記既壇又係點既呢?我好記得,第一次見識到娛樂版既「壇」,係喺某一個有明星(好似係某剛剛傳出婚訊既男藝人)做嘉賓既電訊公司 Event。當日個場唔算大,但係一上到去,就見到有八、九部大攝錄機擺左喺度,前面大概十幾個記者就攞住部單反坐哂喺度 - 係呀,佢地係會自己帶凳架。

咁見到咁大「壇」人,冇一個係識既,咁就當然自動自覺行去後排啦,而喺個 Event 開始左大約半個鐘之後,我就更肯定呢個決定係正確既。唔知大家細個你有冇試過企得太近個電視,俾人問「你食玻璃大架?!」,我話你知,企喺娛記個壇面前大概都係嗰種感覺,不過當然啲言語就激烈少少咁啦。

「D….! 嗰個邊個黎架?行 L 開啦!」
「前面嗰個!你支燈入 L 左鏡呀!」
「影 L 夠啦?捨得走得未呀你?」

只要你唔係佢地個畫面入面需要既野,好快你就會俾佢地鬧到飛起,如果佢地手上支單反換成支槍,應該二話不說就會爆左你頭。講到呢度,相信你都會知道點解娛記係「獅子」 - 玩過鬥獸棋都知,老虎同獅子都可以跳河,不過老虎就只可以橫跳,獅子呢?橫又跳得、直又跳得、兩條河一次跳,亦得。

不過唔講你可能唔知,鬥獸棋仲有一條規矩,就係如果河中間有老鼠,獅虎就唔可以跳河。咁你明白點解娛版記者會覺得我地阻住佢地做野啦。

作者/Aaron Choi
前手機網站編輯,現繼續在在科技、生活層面體驗更多、分享更多。
有機男 Aaron Choi:https://www.facebook.com/techyaaron

About Author

前手機網站編輯,現繼續在在科技、生活層面體驗更多、分享更多。 有機男 Aaron Choi:https://www.facebook.com/techyaaron